أسئلة وإجابات

الإجابة

مساء الخير، ونعتذر عن التأخر في الرد. النظام ما اتكلمش عن الأصناف دي بالتحديد، لكن بالنظر لمكونات الكريم كراميل التقليدي — أساسها حليب وبيض وسكر وفانيليا — نقدر نقيس كل مكوّن لوحده. بالنسبة للحليب: لما يتعرّض لحرارة عالية في الفرن بيتكسّر الكازين اللي فيه، وده مسموح. ولو استبدلناه بكريمة (Sahne) معالجة حرارياً، الكازين بيتكسّر بفعل حرارة المعالجة العالية فبتبقى مسموحة. وكمان الكريم كراميل نفسه بيتطبخ على حمام مائي في الفرن من 45 لـ 60 دقيقة على 160 درجة، وده وقت وحرارة كافيين لتفكيك الكازين تماماً. لكن المشكلة الأساسية هي البيض. البيض ممنوع بكل أشكاله — مقلي أو مسلوق أو في الكريم كراميل أو غيره. ومش ممكن استبداله لإنه المكوّن الأساسي اللي بيدّي الكريم كراميل قوامه المتماسك الكريمي؛ لو شِلناه هيبقى المنتج حاجة تانية خالص مش كريم كراميل. عشان كده الكريم كراميل بشكله التقليدي ممنوع — لكن فيه بديل ممتاز وهو البودينج بالكراميل. بيتعمل بكريمة معالجة حرارياً + نشا ذرة كمكثّف بديل للبيض + سكر للكراميل + فانيليا. القوام بيطلع كريمي جداً وقريب من الكريم كراميل، والطعم ممتاز، ومتوافق مع النظام لإن مفيهوش بيض ولا حليب طازج. أما الجيلي: مكوّناته الأساسية جيلاتين وماء أو عصير فاكهة وسكر ونكهات (في الأنواع الجاهزة). مفيهوش لا ألبان ولا بيض، فمش بيقع تحت أي ممنوعات في النظام. الجيلاتين نفسه بروتين حيواني بيتعمل من العظام والجلد، وغالباً مصدره بقري أو خنزيري — فلازم تتأكد إن الجيلاتين اللي بتشتريه حلال (Bovine = بقري) سواء جوّه مصر أو برّه في ألمانيا. الجيلي مسموح تماماً، بشرط إنه يكون جيلاتين حلال، ويُفضّل تعمله بنفسك في البيت بعصير فاكهة طبيعي من الفواكه المسموحة (تمر، عنب، فراولة) أو بماء وسكر وفانيليا. الأنواع الجاهزة بتحتوي على ألوان صناعية ونكهات صناعية وحمض ستريك — دي مش ممنوعات صريحة في النظام، لكنها مضافات صناعية مش مثالية للصحة العامة. عموماً، سواء عملته في البيت بكل خطواته، أو جبت بودرة جيلي جاهزة من المحل، فهو مش من الممنوعات.